بۇگىن قر پرەزيدەنتىنىڭ جانىنداعى مەملەكەتتىك باسقارۋ اكادەمياسىندا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي مەن تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆتىڭ قاتىسۋىمەن مەملەكەتتىك قىزمەتشىلەردى جاساندى ينتەللەكتپەن جۇمىس ىستەۋ داعدىلارىنا ۇيرەتۋگە ارنالعان AI-Qyzmet وقىتۋ باعدارلاماسىنىڭ اشىلۋى ءوتتى.
باعدارلاما مەملەكەتتىك قىزمەتتىڭ تيىمدىلىگىن ارتتىرۋ ماقساتىندا جۇمىس پروتسەستەرىنە جاساندى ينتەللەكت قۇرالدارىن ەنگىزۋگە جانە ونىڭ مۇمكىندىكتەرىن قولدانۋعا باعىتتالعان.
مەملەكەت باسشىسى قاسىم-جومارت توقاەۆ ازاماتتاردىڭ جاساندى ينتەللەكت سالاسىنداعى بىلىكتىلىگىن ارتتىرۋ قاجەت ەكەنىنە نازار اۋدارىپ, بەس جىل ىشىندە ءبىر ميلليون ادامدى جاساندى ينتەللەكت داعدىلارىنا ۇيرەتۋ مىندەتىنە ەرەكشە كوڭىل ءبولۋ جانە وقۋشىلارعا, ستۋدەنتتەرگە, مەملەكەتتىك قىزمەتكەرلەر مەن كاسىپكەرلەرگە ارنالعان باعدارلاماعا بارىنشا قولداۋ كورسەتۋ قاجەتتىلىگىن اتاپ كورسەتكەن بولاتىن.
«پرەزيدەنت جاساندى ينتەللەكت تەحنولوگيالارىن جانە اۋقىمدى مالىمەتتەر قورىن – Big Data-نى ءتيىمدى پايدالانۋ, زاماناۋي تسيفرلىق تەحنولوگيالار ارقىلى حالىقپەن ەتەنە بايلانىس ورناتۋ جولدارىن جاقسارتۋ قاجەتتىلىگىن العا قويدى. اگەنتتىك مەملەكەتتىك قىزمەتشىلەردىڭ تسيفرلىق قۇزىرەتتەرىن ارتتىرۋ بويىنشا ءتيىستى شارالار قابىلداۋدا. وتكىزىلىپ جاتقان وقىتۋلار مەملەكەتتىك اپپارات قىزمەتىندە جاڭا تەحنولوگيالاردى ءتيىمدى قولدانۋعا مۇمكىندىك بەرەدى», - دەدى دارحان جازىقباي.
پرەزيدەنت جانىنداعى مەملەكەتتىك باسقارۋ اكادەمياسىندا جانە ونىڭ وڭىرلىك فيليالدارىندا وتەتىن وقىتۋ باعدارلاماسى اياسىندا تىڭداۋشىلار تسيفرلىق ساۋاتتىلىقتى ارتتىرادى. جاساندى ينتەللەكت قۇرالدارىن ءتيىمدى قولدانۋ ارقىلى دەرەكتەردى تالداۋ جانە اكىمشىلىك پروتسەستەردى اۆتوماتتاندىرۋ, سونداي-اق شەشىمدەر قابىلداۋ مەن ونىمدىلىكتى ارتتىرۋ باعىتىندا بىلىمدەرىن جەتىلدىرەدى.
وقىتۋ مەملەكەتتىك قىزمەتشىنىڭ كۇندەلىكتى قىزمەتىندەگى جوسپارلاۋ, اقپاراتتى وڭدەۋ, پرەزەنتاتسيالار جاساۋ سىندى جۇمىستاردا جاساندى ينتەللەكت مۇمكىندىكتەرىن قولدانۋ داعدىلارىن قامتيدى. كۋرستا زاماناۋي تىلدىك مودەلدەرمەن جۇمىس ىستەۋدىڭ امبەباپ قاعيدالارى ۇسىنىلادى, بۇل ءتۇرلى جاساندى ينتەللەكت جۇيەلەرىنە وڭاي بەيىمدەلۋگە كومەكتەسەدى.
سونداي-اق وقىتۋ Snack Learning فورماتى بويىنشا ۆيدەودارىستەر تۇرىندە دە وتەدى. مۇنداي فورمات مەملەكەتتىك قىزمەتشىلەردىڭ جۇمىس كەستەسىنە وڭاي بەيىمدەلىپ, وقۋ پروتسەسىن يكەمدى ەتەدى. باعدارلاما اياسىندا وسى جىلى وقىتۋمەن شامامەن 30 مىڭ مەملەكەتتىك قىزمەتشىنى قامتۋ جوسپارلانىپ وتىر.